Er það ásættanlegt í okkar góða samfélagi að einhver hópur fólks komist upp með að svifta þúsundir almennra borgara ferðafrelsi sínu til þess að þrýsta á lægri skattheimtu til handa sjálfum sér? Að einhver hópur fólks loki stofnbrautum og valdi bæði hættu og almenningi og fyrirtækjum tug milljóna tjóni til þess eins að koma sjálfum sér og sínum rekstri í betri stöðu?

Nei mér finnst það ekki ásættanlegt. En af hverju var ekki búið að kæra vörubílstjórana fyrir athæfi sitt? Hefði ekki verið eðlilegra að kæra þá og draga fyrir dómara strax við fyrstu aðgerðir? Ef ég brýt af mér í umferðinni og óhlýðnast lögreglunni er ég þá ekki sektaður eða kærður og dæmdur? Ég átta mig ekki á því hversvegna þessi gamla og góða aðferð til að halda uppi lögum og reglum átti ekki við hér?

Við höfum í þessu landi viðurkenndar aðferðir til þess að mótmæla og koma skoðunum okkar á framfæri. Það að ráðast gegn almenningi eins og vörubílstjórar hafa gert er bæði ólöglegt og siðlaust.

Ég á erfitt með að gagnrýna lögregluna fyrir framgöngu sína í gær að öðru leyti en því að ég skil ekki af hverju sektar og dómstólaleiðin skyldi ekki hafa verið farin áður. Lögreglan bað bílstjórana kurteislega um að fara, hún setti þeim mörk og sagði þeim hvað myndi gerast ef þeir færu ekki fyrir ákveðinn tíma. Vörubílstjórarnir völdu að virða ekki þau mörk og kölluðu yfir sig að vera handteknir og fjarlægðir með valdi og ökutæki þeirra gerð upptæk. Eftir að fresturinn sem þeir fengu var runninn út fengu þeir eðlilega ekki að snúa aftur til ökutækja sinna. Lögreglan getur ekki tekið þátt í sandkassaleik, hún þarf að setja mörk og standa svo við þau.

Í svoleiðis aðstæðum má lögreglan að beita valdi og til þess hefur hún umboð í gegnum landslög. Vald eða umboð lögreglunnar til þess að beita valdi er auðvitað vand með farið og í lögreglunni eins og annarstaðar í samfélaginu eru einstaklingar sem standa ekki undir þeirri ábyrgð sem þeim er falið. Það er hlutverk yfirmanna lögreglunnar að velja þá einstaklinga af kostgæfni sem taka þátt í aðgerðum sem þessum og sigta þá hratt og örugglega úr sem ekki standa sig. Nú þarf að kæra þessa bílstjóra fyrir að valda tjóni og stofna lífi og limum höfuðborgarbúa í hættu með ólöglegum aðgerðum sínum. Það þarf líka að rannsaka þessa atburði og kanna hvort að allir lögreglumennirnir hafi staðið undir þeirri ábyrgð sem hvílir á þeim við þessar aðstæður.

Mér sýnist lögreglan hafa lært af mistökum sínum í samskiptum við meðlimi Falun Gong og Saving Iceland. Lögreglan sýndi vörubílstjórunum þolinmæði, hófsemi, kurteisi og umburðarlyndi. Það er hinsvegar ljóst að lögreglan getur ekki sætt sig við til lengdar að ekki sé farið að margítrekuðum fyrirmælum hennar.

Góðar stundir