Það hefur nú legið í loftinu um nokkurn tíma að CDU og GAL (Grün-Alternative Liste) gætu sameinast í ríkisstjórn Hamborgarfylkis eftir þingkosningarnar sem nú er lokið. Eftir að umræðan um þennan möguleika fór í af stað í aðdraganda kosninganna byrjaði fylgið að hrynja af GAL. Í miklu pati rétt fyrir kosningar lýstu leiðtogar græningja því yfir að rísstjórnarsamstarf við hægrimenn kæmi ekki til greina en það náði ekki í gegn, a.m.k. tókst þeim ekki að snúa vörn í sókn fyrir kosningar. Það voru þung skref fyrir flokkinn að bakka frá þessari yfirlýsingu núna strax eftir kosningar og örugglega ekki til þess að bæta ímynd stjórnmálanna í Þýskalandi.
Freie Hansestadt Hamburg
Þýskaland skiptist í 16 fylki og þar af eru tvö borgarfylki Hamburg og Bremen. Í borgarfylkjunum eru fylkis- og sveitarstjórnarverkefni á einni hendi þannig að ríkisstjórnin (Der Senat, 10 meðlimir) er um leið borgarstjórnin. Borgarstjórnin er studd af fylkisþinginu (Bürgerschaft) en þar sitja í Hamburg 121 fulltrúi. Í þingkosningunum árið 2004 fengu hægrimenn (CDU) hreinan meirihluta en fyrir u.þ.b. ári varð ljóst að litlar líkur væru á að það næðist aftur árið 2008.
Yfirlýsing GAL rétt fyrir kosningarnar setti flokkinn í mikinn vanda eftir kosingarnar en sætin skiptust sem hér segir:
CDU 56 hægrimenn
GAL 12 græningjar
SPD 45 kratar
Linke 8 vinstrimenn
Spennandi tilraun
Það verður gaman að fylgjast með því hvernig stjórnarsamstarfið þróast í Hamburg. Angelika Merkel kanzlari sagði áður en hún sagði nokkuð annað að þetta módel væri alls ekki í deiglunni í Berlín. Reynslan hefur þó kennt Þjóðverjum og mörgum öðrum þjóðum að það sem nútíma stjórnmálamenn segja er ekki það sem þeir meina og ennþá síður það sem þeir gera þegar á hólminn er komið. Tíminn mun leiða í ljós hvort að þetta módel smitar út frá sér eða ekki.
Var að lesa leiðara Morgunblaðsins í dag þar sem Styrmir leggur út frá Hamborgarmódelinu og fjallar um draumastjórn sína Sjálfstæðisflokks og Vinstri Grænna. Ég tek að mörgu leyti undir með honum vegna þess að ég tel að samstarf ólíkra flokka sé heillavænlegra en flokka sem eiga mikið sameiginlegt flökkufylgi. Í samstarfi líkra flokka hverfur “prófíll” flokkanna útávið og í kosningum getur orðið erfitt að skapa skýra aðgreiningu og þar með skýrt val fyrir kjósendur. Hin hliðin á málinu er auðvitað sú að það er erfiðara fyrir ólíka flokka að koma sér saman um stjórnarsáttmála. En það þýðir þá vonandi að þau mál sem sátt er um séu betur ígrunduð og betur rökstudd en ella. Það er hinsvegar langt síðan að íhaldsmenn í Þýskalandi gerðu umhverfismál að áhersluatriði í stefnuskrám sínum. Á sama tíma eru enn til margir sjálfstæðismenn hér uppá Íslandi sem trúa því að umhverfisvernd sé andstæðan við framfarir og arðsemi.