Það eru góðir tímar á Íslandi núna og langt síðan að svona byrlega hefur blásið fyrir neytendur og atvinnulíf. Þenslan sem hefur riðið hér húsum er í rénun og fyrir það getum við íbúar þessa lands verið þakklátir. Við erum á leið aftur inní raunveruleikann - takk fyrir það.
Íslenskar fjölskyldur sem flestar skulda húsin sín og fleira í íslenskum krónum geta búist við því á næstunni að vextir taki að lækka og verði komnir í nokkuð eðlilegt horf í lok ársins 2009. Óhjákvæmilegt verðbólguskot sem fram kemur næstu vikur á meðan gengi krónunnar er að ganga til baka er skafl sem við verðum að fara í gegnum. Þegar við verðum komin þar í gegn getum við vonandi farið að lifa eðlilegu efnahags- og atvinnulífi í þessu landi.
Útflutningsgreinarnar eins og þekkingariðnaður og ferðaþjónusta sem blætt hefur á þensluskeiðinu vegna fáránlegs gengis krónunnar mega nú eiga von á betri tíð með blóm í haga.
Auðvitað munu einhverjir sem fengið hafa mikið fyrir lítið á þennsluskeiðinu uppnefna raunveruleikan kreppu og jafnvel hrópa álver álver eða kalla á aðgerðir ríkisvaldsins til þess að viðhalda gerviveröldinni sem var svo góð fyrir þá.
Fráhvörfin verða einhverjum erfið eins og t.d. byggingageiranum sem virðist hafa fullnægt margra ára eftirspurn eftir íbúðrhúsnæði á örfáum árum. Það er hinsvegar greininni sjálfri að kenna. Ef Helgi í Góu framleiðir 10 ára skammt af Hrauni og Æði á 3 eða 4 árum þá situr hann sjálfur í súpunni og enginn hjálpar honum. Þannig á það líka að vera með byggingageirann. Annars skilst mér að þau íbúðarhús sem byggð hafa verið hér síðustu árin séu svo ílla byggð að framundan sé mikið blómaskeið allra sem sinna viðgerðum og viðhaldi á húsnæði.
Við erum á leið aftur inní raunveruleikan með meiri stöðugleika, lægri vöxtum og einhverju atvinnuleysi sem er hverju hagkerfi nauðsynlegt upp að vissu marki.
Auðvitað verður ekki eins rosalega gaman að vera fjármálaráðherra eða bankastjóri í raunveruleikanum. En fyrir flesta aðra íbúa þessa lands eru bjartari tímar framundan.
Til hamingju Ísland