Þó að mér hafi á árum áður þótt umræðan um skipulagsmál vera hvað mest ósexíumræða sem hægt var að taka þátt í þá hefur sú skoðun mín breyst eftir því sem árin hafa liðið. Skipulagsmál snúast um lífið sjálft, í hvernig umhverfi og hvernig lífi við viljum lifa. Í Hafnarfirði er nú í uppsiglingu mikið skipulagsslys sem er bygging 6 hæða íbúðaturna ofan á þrjár verslunar- og þjónustuhæðir í hjarta bæjarins.
Fyrir utan það hvað mér þykir vænt um miðbæj Hafnarfjarðar þá erum ég og Dóra konan mín búin að festa kaup á verslunarhúsnæði við Strandgötuna þannig að við erum líka nágrannar þessarar lóðar sem nú á að fara að byggja á. Umsagnarfresturinn rann út í gær 22. ágúst og athugasemdirnar sem við sendum inn voru eftirfarandi:
- “Af miðbæ Hafnarfjarðar er í gildi deiliskipulag frá árinu 2001. Með deiliskipulagi er verið að setja fram langtímaforsendur sem allir sem búa eða fjárfesta á svæðinu eiga að geta gengið út frá og byggt væntingar sínar á. Smávægilegar breytingar á deiliskipulaginu fyrir umræddar lóðir árið 2004 voru ágætar enda byggðar á málefnalegum forsendum. Það sem hinsvegar vantar í þessa deiliskipulagstillögu sem hér er til umfjöllunar eru málefnaleg og lögmæt sjónarmið fyrir breytingunni og heildarsýn. Hverjar eru hinar skipulagslegu forsendur fyrir fyrirhuguðum íbúðaturnunum?
- Undirrituð telja að í raun sé verið að vinna deiliskipulag fyrir eina lóð. Úrskurðarnefnd skipulags- og byggingarmála hefur komist að niðurstöðu um að það sé ólögmætt. Vilji bæjaryfirvöld endurskoða skipulag miðbæjarins verður að endurskoða skipulagið í heild á heildrænum grunni.
- Við mótmælum þeim rökum að þörf sé á auknum fjölda íbúða í miðbænum. Í fyrsta lagi er búið að fullnægja þeirri þörf allrækilega með öðrum hætti (Norðurbakki, Lækjargata, Linnetstígur, Strandgata 39). Í öðru lagi ef það eru rökin, gilda þau um allar aðrar umsóknir um íbúðaturna við Strandgötuna í framtíðinni. Gróðaþörf einstakra fyrirtækja sem gert hafa mistök í lóðaviðskiptum geta ekki verið grundvöllur skipulagsákvarðana.
- Ákvörðun breytingu á deilskipulaginu, sem gerir ráð fyrir íbúðaturnum á þessari lóð, er í raun miklu stærri ákvörðun en kynnt er í þessari tillögu. Ef þessir turnar verða leyfðir nú þá er verið að setja fordæmi fyrir allar aðrar lóðir við Strandgötuna með vísan til jafnræðisreglu stjórnsýsluréttar. Á hvaða forsendum ætlar Hafnarfjarðarbær að neita öðrum lóðahöfum við Strandgötuna um sambærilegar breytingar? Þegar fordæmið liggur fyrir verður að öllum líkindum að samþykkja sambærilegar byggingar á Strandgötu 11, Strandgötu 24, Strandgötu 25, Strandgötu 31 og fleiri lóðum þar sem áhugavert gæti verið fyrir verktaka að kaupa byggingar til niðurrifs.
- Turnbyggingar upp á 9 hæðir falla mjög illa að þeirri byggð og byggðamynd sem einkennir Hafnarfjörð og miðbæinn. Turnarnir virka eins og veggur sem eyðileggur ásýnd “gömlu” bárujárnshúsabyggðarinnar sem er eitt af sérkennum Hafnarfjarðar. Á síðastliðnum árum hafa verið byggðar skv. núgildandi deiliskipulagi nýjar byggingar við Strandgötu sem falla ágætlega að núverandi byggð (t.d. Fjarðargata 19, Strandgata 43). Með því að leyfa byggingar upp á 9 hæðir er verið að breyta götumynd Strandgötu verulega.
- Skuggamyndun 9 hæða turna er samkvæmt útreikningum teiknistofunnar Glámu-Kím langt umfram það sem ásættanlegt er. Byggðin fyrir ofan fyrirhugaða byggingu verður í skugga stóran hluta ársins og rýrir það mjög lífsgæði þeirra sem þar búa og verðmæti fasteigna þeirra. Ekki sést til sólar síðla sumars og fram á haust austan megin Strandgötu og Austurgötu. Thorsplan verður myrkvað allan desember. Jólaþorpið sem orðið er eitt af einkennum Hafnarfjarðar verður þar af leiðandi í skugga.
- Það er alþekkt að háhýsi auki vind á jörðu niðri og skapi sviptivinda. Miðbærinn verður ekki staður til að njóta heldur vinda- og skuggasamur staður sem menn hraða sér um. Allt tal um mótvægisaðgerðir síðar meir er ótrúverðugt og ekki hefur verið bent á eina einustu mótvægisaðgerð sem skilað gæti árangri. Skýrslan um vindvist í kringum þessa byggingu ein og sér ætti að duga skipulagsyfirvöldum til þess að henda þessum turnaplönum í ruslatunnuna en þar er varað við hættulegum vindsveipum. Hvað ætlar Hafnarfjarðarbær að gera ef mótvægisaðgerðirnar, sem enn er ekki búið að ákveða hverjar verða, virka ekki? Á þá að fjarlægja bygginguna? Nauðsynlegt er því a.m.k. að láta hanna mótvægisaðgerðirnar og setja um þær skilmála í skipulagið til að tryggja að þær virki og að þær verði framkvæmdar.
- Erfitt er eða ómögulegt að átta sig á hvaða bílastæðakröfur eru gerðar samkvæmt skipulagsbreytingunni. Eins og skilja verður tillöguna eru bílastæðavandamál fyrirsjáanleg. Aðeins virðist gert ráð fyrir einu bílastæði á íbúð í turnunum. Ekki er gert ráð fyrir neinum bílastæðum fyrir þá sem ætla að nýta sér verslunar og þjónusturými í byggingunni. Hvergi er fjallað um hvar leysa á bílastæðamál byggingarinnar. Er tillagan ólögmæt vegna þess? Gera verður nánar grein fyrir bílastæðamálum byggingarinnar.
- Hver verða áhrif tillögunnar á umferðarkerfi svæðisins? Þolir umferðarkerfið umrædda breytingu?
- Skilmálar tillögunnar og greinargerð er ófullnægjandi fyrir margra hluta sakir. Sérstaklega verður þó að telja ámælisvert, þar sem verið er að gera skipulagsbreytingu fyrir lóð í miðbæ bæjarins, að engar kröfur eða skilmálar séu settir um útlit byggingarinnar, byggingarefni eða hönnun hennar. Hvernig ætlar Hafnarfjarðarbær að tryggja að hönnun byggingarinnar verði þannig að sæmi staðsetningu hennar?
- Í tillögunni er hvergi fjallað um hvernig hún samræmist aðalskipulagi bæjarins eða öðrum stefnumarkandi ákvörðunum varðandi miðbæinn. Nauðsynlegt er og skylt að gera grein fyrir því.
Með vísan til framangreindra athugasemda mótmæla undirrituð breytingunni sem augljóslega er gerð með hagsmuni lóðarhafa í huga gegn hagsmunum eigenda annarra fasteigna í nágrenninu og íbúa Hafnafjarðar. Verði tillagan samþykkt áskilja undirrituð sér rétt til að leita réttar síns fyrir úrskurðarnefnd skipulags- og byggingarmála, dómstólum eða á annan hátt og krefjast ógildingar skipulagsins og/eða skaðabóta með vísan til 33. gr. skipulags- og byggingarlaga. Á þeim vettvangi áskilja undirrituð sér allan rétt til að byggja á öðrum rökum eða sjónarmiðum en rakin eru hér að framan.”
Svo mörg voru þau orð.
Góðar stundir