Það er mikill léttir að heyra bæði á innvígðum og innmúruðum frammsóknar- og sjálfstæðismönnum að áframhaldandi ríkistjórnarsamstarf þessara flokka sé óhugsandi. Tilhugsunin um ríkistjórn þar sem hver einasti þingmaður hefði neitunarvald hugnast mér engan veginn og getur að mínu mati ekki orðið þjóðinni til gæfu og gengis næstu árin. Þá eru í mínum huga bara tveir kostir eftir í stöðunni. Enda er það nær óhugsandi að Steingrímur og Jón Sigurðsson gangi í eina sæng með Ingibjörgu til þess að mynda vinstri stjórn.
Aðalatriðið í mínum huga snýst ekki um það hvort að Sjálfstæðismenn ganga saman með VG eða Samfylkingu heldur miklu frekar um hvað verður samið í stjórnarsáttmála næstu ríkistjórnar. Hér eru mín samningsmarkið. Auðvitað hefur enginn áhuga á þeim nema ég sjálfur en ég set þau hér fram til þess að halda þeim til haga og bera saman við stjórnarsáttmálann þegar hann liggur fyrir:
Sjálfstæðisflokkurinn verður að fá heilbrigðisráðnueytið en þar bíður eitt stærsta verkefni næstu ára við að ná tökum á útgjöldum til heilbrigðismála og að einkavæða þar sem því verður við komið. Ég vil fá heilbrigðiskerfi þar sem einkaframtakið fær að njóta sín og samkeppnin verður aukin. Þeir sem vilja borga meira fyrir betri þjónustu eiga að hafa þá möguleika, það hefur gefist mjög vel t.d. í Þýskalandi án þess að hið almenna kerfi hafi tapað gæðum. Ég vil að við aukum samstarf við hin norðurlöndin um sjúkraþjónustu og stefnum að markaðssetningu öflugrar íslenskrar heilbrigðisþjónustu á fyrirfram skilgreindum sviðum í öðrum löndum.
Við verðum að viðurkenna í stjórnarsáttmála næstu ríkisstjórnar að við erum á leið inní Evrópubandalagið fyrr eða síðar. Ég horfi með öfundaraugum til þeirra sem lifa og reka fyrirtæki í Möltu og á Kýpur en þessi lönd eru að kveðja kýpverska pundið og maltversku líruna á næstu misserum. Íslendingar eiga að hefja aðildarviðræður og sjá hvað kemur uppúr pottunum. Þetta ferli tekur líklega meira en 4 ár og því ekki eftir neinu að bíða að hefjast handa. Látum ekki taka okkur í bólinu eins og þegar herinn fór, hefjum undirbúning á þessu kjörtímabili.
Ég vil sjá stóriðjustopp núna þangað til gengið hefur verið frá náttúrverndaráætlun fyrir allt landið. Nauðsynlegt er að taka alla nýtingu á náttúruauðlindum á Íslandi til endurskoðunar og tryggja sjálfbærni hvar sem gripið er niður. Þjóðinn á að eiga auðlindirnar en einkaaðilar eiga að geta nýtt sér þær gegn gjaldi. Ríkið á að draga sig út úr orkuframleiðslu að öðru leyti en því að það á að leigja auðlindirnar til einkaaðila með hárri arðsemiskröfu. Í alla útreikninga á arðsemi af auðlindanýtingu þarf að reikna framtiðarfórnir og fórnir á náttúrugæðum til fulls í krónum og aurum (eða frekar í Evrum og sentum) áður en ákvarðanirnar eru teknar.
Velferðarmálin: Ég má varla heyra á þau minnst eftir kosningabaráttuna og sleppi þeim því hér.
Skynsamir stjórnmálamenn munu líklega sameina ráðuneyti og búa til eitt duglegt og liðugt atvinnuvegaráðuneyti.
VG eða Samfylking? Mér er sama hvaðan gott kemur.
Áfram Ísland